Ise do napasahathon Sulangsulang Pahompu ?

Ise do napasahathon Sulangsulang Pahompu ?

April 1, 2012 by Sampe Sitorus,SE (A. Hitado Managam)

Adong pigapiga ro sungkunsungkun tu ahu taringot tu ise do na pasahathon sulangsulang pahompu di ulaon mangadati.

Sian ias ni rohangku dohononku do tarhatotong do ahu umbegesa sungkunsungkun on. Hape nangkin (Minggu 01 April 2012) sungkunsungkun i tarbege au tong di namanghatai pigapiga ama diluar gedung Graha Cibening di ulaon Pasahat Sulangsulang pahompu kel. Hutagaol/br Tampubolon tu Hulahula nasida Raja Tampubolon. Ia haroro nami Raja Sitorus di ulaon i ima Hulahula Namarhahamaranggi mangadopi gonghon dohot joujou ni lae nami Tampubolon/br Sitorus (bapauda ni br Tampubolon). Ndang pola parsidohot au dipanghataiaon i, alai tangkas do hubege sada natua tua mandok ia napasahathon sulangsulang pahompu INGKON paranak i do alana KEWAJIBAN ni paranak i do pangolihon anakna ninna. Pandapothu dibagas rohangku antar maralo do dohot natuatua i.

Alani i indok rohangku denggan ma hita angka namanjaha blog marsituturan jala marsipatorangan pandapotta.

Songon pamuhai dohononku ma pandapot sian ahu, tarsongon on ma:

Hombar tu goar ni ulaon i PASAHAT SULANGSULANG PAHOMPU, ia napasahathon sulangsulang pahompu ima pahompu ni parboru i, namarlapatan ima ianakhon ni boru dohot hela ni parboru. Goarna pe sulangsulang pahompu, jadi pahompuna ma na ro manulangi ompungna.

Molo ulaon PASAHAT BATU NI SULANG (mangadati sada keluarga alai ndang adong dope ianakhon di nasida) toho ma paranak i napasahathon Batu ni Sulang tu parboru.

Tar songon i ma jolo na boi pinaandar, ditambai angka dongan songon pangidoan na tinariashon di ginjang.

Tabe mardongan tangiang,

St. Sampe Sitorus/br Sitanggang (A. Hitado Managam Sitorus).